Момент за паметење – посета на училиштето за деца со посебни образовни потреби

Минатиот месец, на 26 март, продолжи инспиративната мисија на Ротари семејството со уште една топла и емотивна посета – овој пат во училиштето за деца со посебни образовни потреби ДСУ за рехабилитација и образование „Св.Наум Охридски“ - Скопје, каде што ни се придружија претседателката на Ротари Интернационал, г-ѓа Стефани Урчик, директорот на Ротари Интернационал, г. Даниел Танасе, гувернерот на Дистриктот Словенија и Северна Македонија, г. Мирослав Стравс, минатиот Гувернер на Дистриктот Македонија и Словенија, Раде Христовски, координаторката на Сојузот на Ротари клубови во Македонија, Елена Панова, претставник од издавачката куќа Арс Ламина, Ана Несторовска-Саздовска, авторот Александар Русјаков, како и претставници од Rotary Club Skopje West – клуб кој има изградено цврста и долгорочна соработка со ова училиште преку бројни донации и заеднички активности.

Учениците ги воодушевија присутните гости со прекрасно подготвени музички и драмски изведби, изведени со исклучителна посветеност и емоција.

Работата на училиштето и сите активности ги претставија директорот Јордан Стојановски, како и целиот тим. „Нашето училиште постои за нашите ученици. Ние сме тука да ги поддржиме, охрабриме, воспитаме, научиме, но пред сѐ – да ги сакаме. Училиштето е нашата заедничка куќа исполнета со среќа, љубов и разбирање. Во него, секој ден учиме, но и градиме пријателства кои траат“ – изјави директорот Стојановски.

Во рамки на посетата, беше реализирана донација на 55 книги од издавачката куќа Ars Lamina, во присуство на авторот Александар Русјаков, кој беше длабоко трогнат од настапите на децата и топлиот прием. Тој изјави дека ова искуство ќе остане највпечатливо во неговото срце и никогаш нема да го заборави.

Една од книгите која беше донирана е сликовницата инспирирана од најпознатата анегдота поврзана со Франц Кафка и девојчето кое тагува по изгубената кукла. Иако вистинитоста на оваа приказна никогаш не е потврдена, таа претставува длабока книжевна инспирација. Делото е прв влез на Русјаков во детската литература и беше промовирано неодамна – на 18 февруари. Преку неговиот автентичен, лирски и нежен стил, тој ја преработува приказната на Кафка на начин кој ветува дека оваа сликовница ќе стане омилено семејно четиво.